Субҳи рӯзи 24 феврали соли 2021 таҳти сарвари мутахасиси пешбари шуъбаи Раёсати асноди ҳолати шаҳрвандӣ дар вилоят Нарзизода Ф. дар толори маҷлисгоҳи шуъба маҷлиси ҷамъбастии солона баргузор гардид. Дар кори он мудирони шуъбаю бахшҳои сабти асноди ҳолати шаҳрвандии шаҳру ноҳиҳои вилоят, шуъбаи Хонаи ақди никоҳ ва муҳосибони ин ниҳод иштирок доштанд. Маҷлиси баргузоршуда аз рӯи нишондоди соли гузашта мавриди таҳлилу баррасӣ қарор гирифта ва вазифагузориҳо барои соли 2021 пешниҳод карда шуд. Нарзизода Ф. зимни суханронии хеш ба масъалаҳои афзоиш додани нишондиҳандаҳои мусбӣ ва кам кардани омилҳои номатлуб таваҷҷуҳ зоҳир намуда зикр намуд, ки ҷашни таърихии 30 солагии Истиқлолияти давлатии Ҷумҳурии Тоҷикистонро бо дастовардҳои назаррас ҷамъбаст намоем. Дар маҷлис вазъи иҷрои муроҷиатҳои шахсони воқеӣ ва ҳуқуқӣ натиҷагирӣ карда шуда, бо мақсади таъмини иҷрои саривақтии муроҷиатҳо дастурҳо дода шуд.

  Тибқи ҷадвали тасдиқшудаи шуъбаи Раёсати асноди ҳолати шаҳрвандӣ дар вилоят аз санаҳои 9 то 18 феврали соли 2021 дар бахшҳои сабти асноди ҳолати шаҳрвандии шаҳру ноҳияҳои Ашт, Айнӣ, Б.Ғафуров, Деваштич, Исфара, Истаравшан, Конибодом, Спитамен, Панҷакент ва Ҷ.Расулов маҷлисҳои ҷамъбастии солонаи 2020 ва вазифагузорӣ дар соли минбаъда гузаронида шуд. Дар кори он, намояндагони шуъбаи раёсати асноди ҳолати шаҳрвандӣ дар вилоят, мақомотҳои омору тандурустии шаҳру ноҳия, котибону коргузорони ҷамоатҳои шаҳраку деҳот ва дигар масъулини бахшҳо иштирок намуданд.

 Дар заминаи иҷрои Барномаи таълим ва тарбияи ҳуҳуқии шаҳрвандони Ҷумҳурии Тоҷикистон барои солҳои 2020-2030, санаи 09 декабри соли 2020 мутахассиси пешбари шуъбаи Раёсати асноди ҳолати шаҳрвандӣ дар вилоят Нарзизода Ф., мудирони шуъбаю бахшҳои сабти асноди ҳолати шаҳрвандии шаҳру ноҳияи Исфара Ёқубӣ М., Истиқлол Фармонзода М. ва Ҷ.Расулов Раҷабзода Р. дар пахши мустақими барномаи Рў ба рў-и телевизиони вилоят иштирок карда, вобаста ба иҷрои Қонуни Ҷумҳурии Тоҷикистон «Дар бораи бақайдгирии давлатии асноди ҳолати шаҳрвандӣ» баромад намуданд. Баланд бардоштани сатҳи маърифати ҳуқуқии аҳолӣ омили асосии эъмори давлати ҳуқуқбунёд, ҷомеаи шаҳрвандӣ ва таъмин намудани волоияти қонун мебошад.

 Санаи 08 декабри соли 2020 бахшида ба маъракаи иттилоотии 16 рузи мубориза алайҳи хушунат дар толори Хонаи ақди никоҳи шаҳри Хуҷанд маҳфили доимоамалкунандаи тарбиявӣ-ҳуқуқии “Пайванди муҳаббат” доир гардид. Чорабинии мазкур бо мақсади дар амал татбиқ намудани сиёсати давлатӣ оид ба ҳуқуқи оила, баланд бардоштани сатҳи маданияти ҳуқуқии ҷавонон, устувори нақши оила, бунёди оилаи солим, парваридани ҳисси масъулиятшиносӣ дар ниҳоди никоҳшавандагон, тараннуми арзишҳои олии оила, тарбияи ҷавонон ба ватнадӯстию меҳанпарастӣ, пешгирии омилҳои номатлуб ва хушунати оилавӣ равона карда шудааст. Дар маҳфил як зумра бонувони фаъоли вилоят, намояндагони мақомоти иҷроия ва ҳифзи ҳуқуқ, мудирони шуъбаю бахшҳои сабти асноди ҳолати шаҳрвандии шаҳру ноҳия ва ҷавонон иштирок намуданд.

 Санаи 16 ноябри соли 2020 дар толори Хонаи ақди никоҳи шаҳри Хуҷанд бахшида ба Рӯзи Президенти Ҷумҳурии Тоҷикистон бо кормандони шуъбаи Раёсати асноди ҳолати шаҳрвандӣ дар вилоят, шуъбаҳои сабти асноди ҳолати шаҳрвандӣ ва Хонаи ақди никоҳи шаҳри Хуҷанд маҷлиси тантанавӣ баргузор гардид. Дар маҷлиси тантанавӣ, мутахассиси пешбари шуъбаи Раёсати асноди ҳолати шаҳрвандӣ дар вилояти Суғд Нарзизода Ф. ба сухан баромада зикр дошт, ки барои ман дар васфи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ҳарф задан шараф ва мояи ифтихори бузург аст.

Санаи 14 сентябри соли 2020 Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Мастчоҳ бинои наву замонавии Маркази адлия мавриди баҳрабардорӣ қарор доданд, ки ин лаҳзаҳо ба таърихи мақомоти асноди ҳолати шаҳрвандӣ саҳифаи дигар боз намуд. Иншооти мазкур дар доираи нақшаи чорабиниҳои созандагӣ ба истиқболи 30 - солагии Истиқлолияти  давлатии Ҷумҳурии Тоҷикистон дар масоҳати 875 метри мураббаъ бунёд гардида, аз ду ошёна ва таҳхона иборат мебошад. Бино дорои 12 утоқи корӣ, толори ақди никоҳ, китобхона ва дигар ҳуҷраҳои ёрирасон аст.